ადამიანების მხარდაჭერა BDO-თვის უპირველეს ყოვლისა, საკუთარ ხალხზე ზრუნვას და მათ გაძლიერებას გულისხმობს. კომპანიის გადაწყვეტილებით, 2020 წელს, პანდემიით გამოწვეული მიზეზებით კომპანია არათუ არავის დაუტოვებია, არამედ თანამშრომლების რაოდენობა გაიზარდა სხვადასხვა მიმართულებით. განსაკუთრებული ვითარება ასევე არ შეხებია თანამშრომლების შრომის ანაზღაურებას. 2020 წლის განმავლობაში დაწინაურდა 97 პროფესიონალი და 31 დეკემბრის მდგომარეობით, BDO საქართველოში წარმოდგენილი იყო 11 პარტნიორით, 204 პროფესიული და 48 ადმინისტრაციული თანამშრომლით.
კრიზისზე პირველადი რეაგირების ეტაპზე უპირველესი საზრუნავი ოფისში თანამშრომლების უსაფრთხოების და ჯანმრთელობის დაცვა იყო. მალევე პანდემიის გამოცხადებას კომპანია მომზადებული შეხვდა დისტანციური მუშაობისთვის გამართული, კომფორტული და უსაფრთხო სისტემებით. თანამშრომლებისთვის უწყვეტ რეჟიმში ხელმისაწვდომი იყო ტრენინგები და სამუშაო შეხვედრები სპეციალურად ამისთვის შექმნილ ვირტუალურ სივრცეებში.
სოციალური დისტანცირების პირობებში ინფორმირებულობის და გუნდური სულისკვეთების შენარჩუნებისთვის ექსპლუატაციაში ჩაეშვა BDO-ს ინტრანეტი, ჩვენი ვირტუალური ოფისი, რომელიც დაეხმარა თანამშრომლებს ადვილად გადაელახათ პირველი სტრესი და მიუხედავად იმისა, რომ ქვეყნის სხვადასხვა წერტილიდან უწევდათ მუშაობა, შეენარჩუნებინათ გუნდურობისა და ერთობის შეგრძნება.
მუდმივი განვითარება
BDO-სთვის განვითარება, თანამედროვე ტენდენციების თუ ტექნოლოგიების ათვისების და დანერგვის მიღმა, უმთავრესად ინოვაციურ აზროვნებასა და მიდგომებზე მუშაობას ეფუძნება. ვთვლით, რომ მომავლის პროფესიონალებს, რისი სამართლიანი ამბიციაც ჩვენ გვაქვს, უპირველეს ყოვლისა უნდა შეეძლოთ, სწორად განსაზღვრონ ინოვაციური გადაწყვეტების დროულობა და მნიშვნელობა კონკრეტული სიტუაციისთვის, გრძელვადიან პერსპექტივაში კი გაიაზრონ მათი როლი და ეფექტი პროგრესის თვალსაზრისით.
თუმცა დღევანდელ სამყაროში არც „მომავალი“ და არც „გრძელვანიანი პერსპექტივა“ დროში შორი აღარ არის, არამედ უბრალოდ განვითარების შემდეგ, გარდაუვალ ეტაპს გულისხობს. სწორედ ამის რწმენით ვუდგებით ინოვაციებს და ციფრული ტექნოლოგიების დანერგვას BDO-ში. 2020-ის დასაწყისში პანდემიის და სოციალური დისტანცირების გამოცხადების პერიოდისთვის კომპანია უკვე იმდენად იყო მზად ინფრასტრუქტურის თვალსაზრისით, რომ ფაქტობრივად ერთ კვირაში სრულფასოვნად გადავიდა მუშაობის ონლაინ რეჟიმზე. ერთი თანამშრომელი ინტერნეტთან დაკავშირებული ერთი მოწყობილობით (ლეპტოპი, სმარტფონი) უკვე სრულყოფილი, მოძრავი BDO-ს ოფისი გახდა.
ISO/IEC 27001 სტანდარტით დაცულმა ინფორმაციულმა და მონაცემთა უსაფრთხოებამ უზრუნველყო სამუშაო გარემოს და სერვისების ღრუბელზე გატანის სრული კომფორტი ჩვენი თანამშრომლებისა და კლიენტებისათვის. ჩვენ ვმუშაობთ, რომ მაქსიმალური კომფორტი შევუქმნათ კლიენტებს ბიზნეს ურთიერთობაში და თანმიმდევრულად გადავიყვანოთ განვითარების ახალ ეტაპზე.
კოლაბორაციის თანამედროვე პლატფორმის BDO Portal-ის დანერვა მომსახურების პროცესში ერთ-ერთი იყო, რამაც სწორედ ამის შესაძლებლობა მოგვცა - ვასწავლით და ვეხმარებით კლიენტებს, როგორ გადავიდნენ უმტკივნეულოდ და ეფექტურად ციფრული გამოცდილების საფეხურზე.
BDO Portal-ის დანერგვის პარალელურად, 2020 წლის განმავლობაში BDO-მ ავტომატიზაციის, მონაცემთა ანალიტიკის, აპლიკაციების, მხარდაჭერის პორტალების, ჩეტბოტების რეკორდული სერია შექმნა. ეს იყო კრიზისზე რეაგირების და მისი შემდგომი მდგრადობის ეტაპისთვის აუცილებელი განვითარება, რამაც გაამარტივა ახალ რეალობაში გარდასახვის პროცესი.
სერვისების ციფრულ ფორმატში მიწოდების, მონაცემების ანალიტიკის და ავტომატიზაციის ფართო შესაძლებლობები იქცა BDO-ს ახალი ბრენდის -
BDO Digital-ის წინაპირობად, რომლის ქვეშაც 2020 წელს კომპანიის ტექნოლოგიური სერვისების მთელი სპექტრი გაერთიანდა. მიმართულების სერვისები მიზნად ისახავს ბიზნესისთვის ციფრული ტრანსფორმაციის პროცესებში დახმარებას, მონაცემებზე დაფუძნებული გადაწყვეტილებების მიღებასა და ანალიტიკის თანამედროვე შესაძლებლობების ხელმისაწვდომობას, ასევე კიბერუსაფრთხოების ახლებურად გააზრებას.
პროფესიონალიზმი და ბიზნეს ეთიკა
2020 წლის კრიზისი ნამდვილი გამოცდა იყო ბიზნესისთვის. არც ისე იოლი აღმოჩნდა შესაძლებლობების დანახვა გამოწვევებს შორის, თუმცა ეს აუცილებელი იყო გადარჩენისთვის. ამ ვითარებაში BDO-მ რესურსების მაქსიმალური მობილიზაცია გააკეთა კლიენტების და მათი საქმიანობის მხარდაჭერისთვის და კომპანიის ვებსაიტზე სპეციალური
კრიზისის საპასუხო გვერდი შექმნა. ეს იყო ერთიანი ჰაბი მიმდინარე გამოწვევების საპასუხო გადაწყვეტების, სპეციალური სერვისების, უსასყიდლო ვებინარების, ტრენინგების, ანალიტიკური მასალის, მრავალფეროვანი მედია/ონლაინ რესურსების და 24/7 კონტაქტის შეთავაზებით ყველა დაინტერესებული მხარისთვის.
პანდემიის დაწყებიდან მალევე BDO-მ გლობალურად წარადგინა ბიზნესისთვის ახალ რეალობაში ადაპტაციის მოდელი -
Rethink-ი, რომლის მიზანი იყო სხვადასხვა სექტორში მოქმედ, განსხვავებული მასშტაბის კომპანიებს დახმარებოდა ახალ რეალობასთან ადაპტაციაში. BDO საქართველოში აქტიურად ჩაერთო მოდელის პრაქტიკულად ამუშავების პროცესში, გაეშვა ქართულენოვანი ვებგვერდი და კონცეფციის ფარგლებში დაიწყო გამოცდილებისა და მიდგომების გაზიარება საქართველოს ბაზარზე მოქმედი კომპანიებისთვის.
Rethink-ის კონცეფცია არის 3 ეტაპისგან შემდგარი პრაქტიკული მოდელი, რომელიც რელევანტურობას ბუნებრივია კიდევ დიდხანს შეინარჩუნებს. მოდელი ეხმარება ნებისმიერი ტიპის, მასშტაბის და ინდუსტრიის კომპანიებს სწორად გაანალიზონ პანდემიის რომელ ეტაპზე რა პრობლემამ შეიძლება იჩინოს თავი და რა გზებით შეიძლება მასთან გამკლავება იმისთვის, რომ შეძლონ წარმატებით გარდასახვა ახალ რეალობაში.
ინოვაციების 20 წელი
2020 წელს BDO-ს საქართველოში არსებობის 20 წლის იუბილე შეუსრულდა. პანდემიის გამო შეგნებულად უკანა პლანზე გადავწიეთ ამ მნიშვნელოვანი თარიღის სათანადო აღნიშვნა, თუმცა სწორედ შექმნილი ისტორიის და კომპანიის უცვლელი მისიის ინსპირაციით გავიარეთ სირთულეებით სავსე უჩვეულო წელი.
21-ე წელია, BDO ფეხდაფეხ მიჰყვება ათასწლეულს, რომლის რიტმი და თავისებურებები ზუსტად აისახება კომპანიის განვითარების ხასიათზე. ურთიერთობის უნიკალურ კულტურაზე და ინოვაციურ აზროვნებაზე აგებული ბრენდი აერთიანებს მომავლის პროფესიონალებს თანამედროვე კომპეტენციებით, განვითარებისკენ სწრაფვით და გულისხმიერი დამოკიდებულებებით.
BDO-ს ისტორია და გამორჩეული გუნდი ამბიციური გეგმების დასახვის მყარ საფუძველს გვაძლევს. წინ გასავლელი გზა და საინტერესო პოსტკრიზისული პერიოდია, რომელსაც დაგროვილი გამოცდილებით და ახალი ენერგიით ვხვდებით.